近期大家為咗非典型肺炎，搞到個心囉囉攣，有病都唔敢去公家醫院，帶挈私家醫務所生意。蘭西收到料，荃灣區有唔少私家醫務所四圍搵舖，有啲快將租約期滿，原本唔打算續租嘅，都改變態度。
美聯舖位部助理營業董事黃金鳳同蘭西講，荃灣青山公路富裕樓地下十八號舖，約三百五十方呎，租期至今年五月屆滿，租客原本唔打算續租，但非典型肺炎爆發後，令佢改變初衷，有意續約兩年。間舖現時月租五萬，續租租金約四萬五，雖較其他有意洽租嘅醫務所低，但業主考慮到續租唔使提供免租期、代理佣金等，所以平啲都制。
黃金鳳又話，由於多咗醫務所喺荃灣區搵舖位，出價變得好積極，有啲畀到月租六萬至七萬蚊，比市值高一成至成半，又指明要做二十四小時㖭！香港人真係唔放過每個搵錢機會。

員工接觸病患中記送有薪假
非典型肺炎觸動全港市民嘅神經線，人心惶惶。𠵱家經濟已經唔好，重遇到致命怪病，好多打工仔就算傷風感冒都唔敢放假，擔心冇咗份工。中記噚日出指引，如果員工有家屬「中招」，又證明到有接觸過，就送七日有薪假畀員工，等佢安心休息。另外，聽講牛頭角淘大花園「中招」嗰幾名中，有一位係地產代理。