韓國型男蘇志燮夥拍女星孫藝珍合作嘅新片《現在很想見你》，將於下月4號喺台灣上映，而蘇志燮今日就聯同新片導演李章焄飛抵台灣宣傳，獲唔少粉絲到場接機。

約中午時份，蘇志燮以黑、白打扮現身機場，雖然佢戴住口罩及帽，遮到剩返對眼，但仍然親民地向粉絲揮手示意。蘇志燮預計喺台灣逗留三日兩夜，並於今晚出席首映禮，又連跑11場特映會，同台迷進行互動。

而《現在很想見你》於本月14號白色情人節時喺韓國上映，噚日吸逾6萬觀眾入場，力壓荷李活電影《悍戰太平洋2：起義時空》（Pacific Rim：Uprising），再次成為單日票房冠軍，目前累積入場人次已達逾188萬人次，有望於本周內突破200萬入場人次。

更多韓流，喺晒《娛果》
http://fb.com/appledailyent