容祖兒同馮翰銘今日喺沙田為下周一(6日)舉行嘅拉闊音樂會綵排，祖兒透露將會獻唱不少英文歌，又邀得黃耀明、葛民輝同陸永等擔任嘉賓。問祖兒有冇邀請男友劉浩龍？佢話有請佢：「不過唔知佢嚟唔嚟，因為佢都有工作在身。」

講到今次會唱好多唔同嘅歌，祖兒話唱歌會得到好多正能量，仲試過感動到流眼淚：「我哋除咗分享音樂，仲會分享感情。」現場即有記者即問馮翰銘，祖兒係咪有同佢分享感情事啦，身旁嘅祖兒即搞笑話：「你小心啲講呀！」馮翰銘竟然口快快踢爆佢有分享過開心同唔開心嘅嘢，祖兒即解釋：「冇唔開心呀，咁人生都總有開心同唔開心嘅。」

提到好姊妹蔡卓妍拍內地節目《全員加速中》時整親隻腳條韌帶，祖兒話：「嚇死我呀，我隻腳都未好返，佢又中，真係將我哋生命作為賭注。」她又自爆為醫腳傷，去過到訪過奇怪醫館：「最恐怖係我著返隻襪嗰陣，有枝未用過嘅針筒喺入面。」