被喻為韓國金球獎嘅「百想藝術大獎」，今個月25號就會舉行，好多關心韓國電影嘅網友，都同阿Net一樣想快啲知道邊個會成為今年嘅大贏家，最近搜狐網就發起咗一個選舉，叫網友估吓各個大獎嘅得主。劇集組別排名方面，視帝視后暫時由《雪之女王》嘅玄彬同《黃真伊》嘅河知雲領先；至於影帝影后則由《卑劣的街頭》嘅趙寅成同《再造人之戀》嘅林秀晶高票跑出。
今年有份角逐影帝嘅演員，偶像派實力派各佔一半，不過網友始終鍾意靚仔多啲，帶頭嘅趙寅成得票率近7成，排第二係《我們的幸福時光》嘅姜東元，有17%得票率；影后方面，資歷最淺嘅林秀晶有近6成得票率，之後先輪到主演《老千》嘅影后級演員金慧秀。

玄彬遙遙領先

電視劇方面，阿Net以為一定好多人支持《朱蒙》宋一國做視帝，冇諗到結果係由玄彬以76%得票率遙遙領先。河知雲喺《黃真伊》入面演古代妓女咁出色，領先唔出奇，剩低《朱蒙》嘅韓惠珍、《戀愛時代》嘅孫藝珍同《幻想的情侶》嘅韓藝瑟喺後面爭崩頭。
另外，百想藝術大獎嘅官方網站都搞緊「人氣獎」投票，《再造人之戀》嘅Rain暫時係電影組別最高得票者，唔知佢當晚有冇機會上台領獎呢？
百想藝術大獎官網
網址： http://isplus.joins.com/100sang/
《搜狐網站》投票
網址： http://yule.sohu.com/20070330/n249083771.shtml
版主：阿Net
本欄逢周一至六刊出