F1返嚟啦！新賽季嚟緊周日就會喺墨爾本開車，周五率先上演首節試車，喺巴塞隆拿試車俾法拉利搶晒風頭嘅平治，睇嚟有心先嚟下「馬」威，兩位車手咸姆頓同保達斯本來已經夠快，仲要早早出動埋超超軟胎，結果咸仔以1分24秒220造出最快圈速，比自己舊年喺同一賽道嘅首節試車圈速足足快咗5秒！保達斯以1分24秒803緊隨其後，主場希望、紅牛嘅澳洲車手歷斯亞度就以1分24秒886排第3，戰車表現暫時好過法拉利喎。

講到鬥快，印度力量戰車暫時唔夠鍊，兩位車手佩雷斯同奧干喺首節試車只係排第10同第16，但佢哋喺新贊助下換上全新迷人pink，肯定係全日最搶fo嘅戰車！