美國股市上周五繼續大插水，但港股噚日只跌54點，收報14176，跌市之際成交縮至155.6億元，反映大市好硬淨，唔知係咪同基金櫥窗粉飾有關？
中遠控股（1919）傳以4.25元下限定價，公開招股部份，傳聞只得50%認購，配售部份亦只得2.7倍超購，唔少芬佬所獲得的貨源比預期多。上市後，此股料遇上頗大沽壓，破底似乎在所難免，問題係以滙證為首的承銷團要跌至乜位才走出來接貨，其實以招股價4.25元計，05年備考預測PE僅6.96倍，都算抵買，如果再破埋底，相信會吸引長線基金入市收集。
黑客話，滙證之前包銷的交通銀行（3328）現時仍企穩在2.80元，未曾破底。交行上市至今，毋須勞煩包銷商出手接貨，相信滙證應有充足彈藥替中遠控股護航。
和記港陸（715）噚日朝勁升53.75%至1.23元，午後回至0.95元收市，仍升18.75%，成交金額增至1.87億元。公司發聲明話不明升因，阿虎記得公司早前講過手頭有現金20億元可作併購，似乎暗示往後可能有動作。市場預期就算無併購對象，亦有機會炒派高息，所以一樣有得炒。