香港首位女特首林鄭月娥個人特色之一，係喺喜慶等重要場合以旗袍示人。似乎佢都知道，佢嘅穿衣之道都幾受市民「關注」，噚日就喺新開設嘅fb上載短片，剪輯喺國家主席習近平訪港期間佢着過嘅旗袍，仲喺帖文上寫道，旗袍莊重典雅，適合應付隆重場合，叫大家估吓習大大訪港呢幾日佢着過幾多套旗袍，仲自爆有成30幾套，當中有本土設計，而且仲會翻着，自稱好環保。

林鄭喺片段中話呀，習大大訪港時自己着嘅大部份都係舊衫，但喺宣誓成為特首時着嘅粉紅色旗袍同外套則係新訂做，由本地著名設計師設計，但冇透露係邊個喎，佢話作為首位女特首，應該展示「東方女士嘅特點」，亦希望藉此推廣本地設計。
至於近年不時着旗袍嘅佢，自爆有30幾件旗袍，又話其實都夠用，「因為我時常都可以配搭一件唔同嘅外套」，又話翻着旗袍係「環保生活行為」，希望可以將擁有嘅旗袍物盡其用。唔少網民都有喺佢facebook留言，仲將佢同龍蝦相提並論，話佢靚過梁唐青儀好多，應該一早教路，亦有網民話唔關注佢衣着儀容，着緊嘅係佢嘅政績，例如會唔會跟進689嘅UGL案。
而林鄭上任前接受港大社會科學院院長卜約翰（John P Burns）訪問，回顧喺港大讀書嘅日子時就話，最遺憾當時冇攞過獎學金，「我做得非常好，我以為自己非常好。我申請過一兩次（獎學金），有面試過，但唔得……」。

Ka Fung Yeung：好過龍蝦好多，但內心端正才重要。
William LI：係唔錯，不過立案調查689會令你更靚。
Que Fung：處理好黑警同黑社會嘅問題先講嘢啦
Helen Hung：梁太早就應請教林太穿衣之道啦！
資料來源：林鄭fb


李八方

97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk