一志置業嘅太子道單幢樓SkyGarden，上個禮拜突擊開賣銷情熱烈，近日重吸引到一家大證券行老闆入番間㖭。聽香港置業高級區域經理葉展均話，個客用七百四十萬買咗高層三房D單位，面積一千零五呎，呎價七千三百六十三蚊，計劃用嚟長線收租。
個客認為SkyGarden景觀唔錯，價錢都算合理，所以諗咗冇耐就扑槌嘞。
原來呢名老闆好留意豪宅市況，重不斷入市吸納，近排買咗嘅有尖沙嘴擎天半島同何文田君頤峰，早年就入市畢架山嘅豪宅。股市近一年愈嚟愈火熱，𠵱家每日成交閒閒哋都有百幾二百億，證券行自然收入豐厚，用一千幾百萬買樓，喺佢哋眼中都係濕濕碎啫。
日前滙豐艾爾敦潑樓市冷水，但從呢兩日市場反應嚟睇，似乎完全唔受影響。投資者用真金白銀入市，對樓市投信心一票。