獨立股評人孫柏文上星期獲馬會通知，抽中佢可以買新馬，網民即刻踴躍幫佢隻新馬改名，其實好簡單，咪就係「一注獨贏」、「白銀乜乜」之類，事關孫柏文最鍾意叫人一注獨贏買白銀，𠵱家一講白銀同一注獨乜，都令人想起孫柏文。
不過孫柏文就另有想法，佢平日講股票，改馬名當然要拉股神畢菲特落水，咁先夠架勢吖嘛。佢指，當年畢菲特曾批評人哋買私人飛機，後來買咗隻自用，仲發現好好用，好方便，於是佢幫隻飛機命名為「The Indefensible（冇得拗）」，後來直情改為「The Indispensable（不可或缺）」。

名下另一馬未嘗一勝

就係呢個古仔，令佢想到叫隻馬做「Indefensible」，萬一女友鬧佢嘥錢養馬，佢就咁樣答女友喎。英文名係咁，中文名呢？華華建議佢叫隻馬做「冇得駁（博）」，間接叫人唔好博佢隻馬，事關佢馬運一般，𠵱家同朋友夾份嘅「樂家將」，2013年到港至今，未贏過一場馬，佢揀馬嘅眼光好一般。
佢未定買邊度嘅馬仔，希望喺24個月買馬限期前，有國家經濟出現嚴重金融危機，令當地育馬人士衰到要忍痛割愛，咁佢就會出手嘞。佢呢個講法認真大吉利是，有國家爆金融危機，香港能難獨善其身嗎?

李華華
mailto:[email protected]