黃芷晴今晚喺中環出席「Armani Box」概念展覽揭幕禮，佢話噚日係爸爸黃日華嘅56歲生日，咁啱爸爸鍾意Lego，所以就送咗Lego俾爸爸做生日禮物。芷晴話：「今次買咗大型小小，送咗兩盒狗狗Lego，係古代牧羊同八哥，佢太鍾意Lego啦，所以屋企o依家有個小裝修，俾個櫃佢放Lego，因為佢已經霸佔咗媽咪擺水晶個櫃。噚晚同屋企人一齊食飯，男朋友都有去。」

之前有報道話黃芷晴接受男友Jimmy求婚，但佢爸爸黃日華嫌Jimmy未達標，同Jimmy關係麻麻（新聞連結： http://bit.ly/2j02otA ）。問到芷晴有冇宣佈結婚喜訊，佢話：「唔知點解會上到雜誌封面，都係無聊，唔係真。但都有影響到爸爸同男朋友，所以想澄清，佢哋相處得好好，爸爸都好開通。爸爸同我都喺呢行，所以有免疫力，但男朋友係圈外人，怕影響佢工作，佢唔係想入呢行，係自己一時大意，將啲相放咗上社交平台，點知俾人偷咗要嚟作故仔。」問芷晴幾時結婚？佢話順其自然。芷晴仲話男朋友有送衫褲俾爸爸做生日禮物，又話男友同爸爸關係好好。