【本報訊】29名水警涉濫用水警輪到蒲台島食海鮮風波越鬧越大，消息指，警方雖委派另一總區探員徹查事件，但有人疑以「大話冚大話」，臨急臨忙向「老友上司」補辦申請使用水警輪手續，又暗中打聽誰是「深喉」，令前線水警都對今次「自己人查自己人」失去信心。消息指捲入風波的警隊高層曾多次濫用水警輪到長洲、南丫島及蒲台島食海鮮。
消息指，被踢爆濫權的警官，最近幾日仍若無其事、談笑風生，不但毫無悔意，還令下屬查探當日出船的同事，圖揪出向傳媒揭露事件的深喉。他指事件最初由水警總區自行調查，輿論關注後雖改由另一總區跟進，但涉及事件的水警，竟可「自己寫口供」而非由警員問話落口供，「呢單嘢自己人查自己人，得啖笑！」

「休班有乜理由坐水警輪」

有水警踢爆，該名高層嗜食海鮮，調任水警兩年來，約每隔三周就濫用水警輪與同事四出覓食，「佢其實唔係第一次咁樣去蒲台島，去長洲就慣咗喺碼頭買海鮮再去檔口煮，喺南丫島榕樹灣都有間相熟海鮮館幫襯開。」今次29人乘坐65號水警輪到蒲台島開紅酒擦海鮮，是下屬擦鞋預祝他將升任總警司。
消息指每次「大sir」出海，前線警員都要先花4小時洗船，有人頻頻濫用水警輪朝10晚4蛇王食海鮮，影響水警運作。「呢單嘢好多疑點，佢話係去蒲台島開會，但29人當中，大部份係行政部門嘅人，佢哋唔屬行動部人員，根本唔使開呢啲會。佢哋解釋過有啲食海鮮嘅警員係休班，咁休班有乜理由仲坐水警輪呀？」
警方發言人昨表示，警方極之關注這宗事件，並已由行動處處長古樹鴻親自督促新界南總區進行深入調查，確保調查工作是全面及公正，警方定會嚴肅處理，絕不容許任何妨礙調查工作的情況出現。警隊要求每名警務人員均需嚴守紀律，若任何人員，不論職級，經調查後證實違規，將要接受紀律處分及適當的懲處。