【同何超鳳仲係朋友 】何志堅談離婚後生活:獨立兼多啲自由
離婚何超鳳何鍶珩何志堅
賭王何鴻燊二房千金何超鳳喺今年爆出同老公何志堅16年已經離婚,結束23年夫妻關係,其後超鳳以電郵回應《蘋果》承認此事,仲話佢哋已經作出一切妥善安排,各自開展新生活,希望大家可以俾啲空間佢哋,尤其係女兒,好好生活和發展。 (新聞連結: http://bit.ly/2mvrG30 )
何志堅噚晚出席喺中環舉行嘅《M超跑會》晚宴,今次係離婚後首度現身,何志堅同超鳳依然係朋友,離婚之後,係一個新嘅生活:「獨立啲,多啲自由。我哋依然有聯絡,我屋企請食飯都有佢,你哋影唔到咋,佢啲朋友又係我啲朋友。為咗小朋友一定要有個關係。」問佢係咪因為第三者而分開?佢迴避話:「都係唔好講佢啲嘢。」
離婚後嘅何志堅,曾同朱慧敏傳緋聞,佢澄清話:「食過啲飯冇咩特別,係普通朋友。請人返屋企食飯就話有飯局,有不良企圖,係人都驚同我食飯喇!我都好鍾意請朋友食飯,不過冇乜嘢事都唔同娛樂圈嘅人,怕咗。」問佢o依家有冇另一半?佢話:「冇特別,都係食吓飯咁。」講到大女何鍶珩(Beatrice)撻着外籍男Jordan,佢話:「佢大個都唔會阻止佢,佢哋有自己空間,佢鍾意就得。」
另外,中國新十大女高音歌唱家周詠琁亦有現身,佢下個星期再出發去加拿大做巡迴,所以中秋唔可以同屋企人過:「會去十天左右。小朋友會在香港,他們沒有假期,這兩天會陪陪他們。」一家人會預祝中秋節:「好遺憾今年中秋節陪不到他們,會想念的,這陣子工作又忙,周圍巡迴演出,明天跟他同學和老師一起慶祝也很有意義。」
何超鳳當日宣佈離婚,希望大家可以俾啲佢哋。(資料圖片)