楊冪早排好sweet咁宣佈懷孕三個月，日前呢位美麗孕婦仲大住個肚去開工，拍攝新戲《小時代3》，楊冪喺低溫天氣下拍攝一場夏季運動會場面，喺運動場跑道上又跑又跳，佢仲要著短衫同短運動裙褲。

陀B幾個月嘅楊冪，今午喺網上留言，原來腹中塊肉同佢有「互動」，個BB不停踢佢，楊冪話：「最近有人總是把肚皮當球踢，踢踢踢～沒禮貌。」

睇落去佢好似喺到狂呻咁，其實好明顯係曬命啦，可以畀自己嘅BB踢肚皮，係一種好幸福嘅感覺嚟㗎。呢個曬幸福嘅句子一出，即有逾萬七名網民留言，好多人都讚楊冪好幸福，仲話遲啲個BB，會喺佢個肚到唱歌跳舞㖭呀﹗

至於劉愷威就留咗大堆表情符號當作留言，其中一個更係直豎姆指圖案，認真鬼馬喎﹗