韋達曾連續13季雄據香港冠軍騎師寶座，於2019年2月正式掛靴後，韋達曾花數月時間，走訪歐洲、杜拜、南非及澳洲等地，向世界頂級練馬師取經，學習馬房經營之道。

其後他上季在沙田奧運馬房設廐，展開從練生涯，韋達首季從練摘下44Win，於成績榜打入十大，相信對於之前奧運馬房魔咒之說，應可一掃而空。

他今季又可進駐從化，養馬量再多10匹，相信成績必可更勝上季。

韋達挾13屆冠軍騎師之名開倉，一般人都會以其成績與前任波士告東尼相比，因告東尼同是以冠軍騎師身份轉任練馬師，告仔首季從練亦已摘下42Win，而韋達上季則勝出44Win，表現及格有餘。

韋達與告東尼同屬冠軍級人馬，相信韋達今季要進軍各項大賽之餘，成為冠軍練馬師亦係另一目標，但強如告東尼，亦要在從練第四季才可登上冠軍寶座，且看韋達又如何。

上季韋達首季開倉，當然全力省招牌爭取馬主支持，除接手不少舊馬都可交出表現外，部署新馬手法亦相當成功。

上季韋廐曾安排18匹自購新馬初出，共獲四Win，其中在12月21日沙田日賽，分別憑2.2倍「輝煌芯」及48倍「量化歡騰」兩匹初出馬成功起孖。

此類D布馬就算未能一出即勝，亦可在其後補中，總計上季韋達44Win中，D布馬佔19Win，所以今季吼實韋廐E布馬，一定冇錯。

而韋達上季雖未贏過大賽，但在大賽日或特別日子，卻往往有頭馬交出，如開鑼日贏「明月昇輝」開糊，國際賽日爆冷勝出「得勝駒」。

元旦日憑「肥仔」、「聚才」起孖，初三賀歲賽又贏「聚才」，女皇盃日「將悅」、「承你所願」更只配陳嘉熙便可起孖。

7.1賽日則以「順意寶」（現屬苗廐）捧走粵港盃，煞科戰又有「維港奔流」（現屬羅廐）埋齋，今季重要賽日，韋達上陣馬不妨優先考慮。

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：

iOS / Android