永隆銀行（096）收購戰日日有新消息，最新係有報章報道，招商銀行（3968）提出的收購只會購買永隆的銀行業務，不買保險業務、永隆中環總行及旺角中心等旗艦物業，令收購市賬率降至2.85倍，可符合「消息人士」提供之所謂官方准許水平。
假如報道屬實，理應不利銀行股表現，惟昨日本地銀行股繼續喪炒，主要係中資及外資買本地銀行成風，呢股收購潮有排玩。除市傳國壽（2628）擬購永亨（302）之外，大新金融（440）及旗下大新銀行（2356）大股東亦表示獲外資洽購，並對賣盤持開放態度。

本地銀行突興起賣盤兼買家湧現，係反映緊揸住本地銀行牌，真係皇帝女唔憂嫁？其實自從本地中小銀行如道亨、亞洲商業等被併購後，銀行業競爭漸大，有大財團背景，遠比家族式經營有前途得多。因此，大新系真有可能趁估值炒高而賣盤。
噚日大新金融升10%，升幅多過旗下大新銀行的4%，表面睇，係若出售大新銀行，大新金融直接收錢最受惠，但睇真啲，原來大新金融的估值，因控股公司身份而長期被低估。大新銀行市值151億元，大新金融持75%約值113億元，惟大新金融市值僅164億元。
由於集團近年銳意發展保險業務，包括在國內的長城人壽（持20%）及澳門人壽保險等，有大行估計，其保險業務每股估值有24元，且盈利處於高增長。大新銀行P/B僅1.5倍，若以3倍P/B出售，大新金融值幾錢有數得計。