嬌小身軀爆力驚人 起跑Ready!

蘋果日報 2008/01/20 00:00


人同人之間嘅跑步競賽,往往好重視瞬間爆炸力,車亦係一樣,唔少車主幫座駕改裝都會集中喺呢部份。今日呢部VolkswagenGolfR32,花咗17萬多去改裝,咪睇小佢外形嬌小冇乜霸氣,實情新加咗Kompressor裝置嘅3.2V6引擎,單係馬力輸出已經大幅增加70匹達到320匹,起跑、加速爆炸力絕對驚人!

記者:鄭達基
攝影:王文忠
模特兒:Nika(BXMedia)
查詢:TWAutosport(21420001)
易改裝受歡迎
去年多次出席珠海賽車場TrackDay,發現不少GolfR32足迹,八卦走去問吓啲參賽者點解揀呢款車?點知答案全部一樣,都係貪佢起步加速夠快,加埋改裝料五花八門,好好玩!又係喎,淨係計自己揸過嘅改裝版GolfR32,花款已經多到10隻手指數唔晒。
不過今日介紹嘅重改GolfR32就更巴閉,你肯定會懷疑:「咪玩啦,個樣變都無變過,你仲夠膽話係重改?」無錯,佢的而且確係一部經重度改裝嘅GolfR32,事關佢嘅改動主要喺機械部份,車主認為部車嘅起跑加速反應都係差些少,所以特別喺機械配搭方面入手。
empty
empty
GolfR32原版淨車價:
約40萬(合泰汽車:28828938)
empty
■跑車懸掛加新換嘅18吋高性能跑胎,掟彎更淡定。
推背感像飛機
講到明主力改裝部份係機械嗰Part,即刻打開個頭冚,睇吓究竟葫蘆入面賣咩藥!看後完全摸不着頭腦,望嚟望去都覺得同原裝無分別,究竟改咗乜?
歐洲車改裝專家Tony行過嚟指點迷津,話台偈雖然睇落似原裝,但原來內藏咗由Ruf提供嘅Kompressor機械增壓裝置,而引擎所連接嘅排氣系統,由頭到尾都換咗Milltek出品,連個滅聲器都換晒,令馬力輸出由原來250匹大幅增加70匹,達到320匹,而扭力輸出亦由原來320Nm增多約98.1Nm,配埋原有轉檔反應快過手波嘅6前速DSG半自動波箱,咁你話佢起跑加速嘅反應快唔快啦!
齋講感受唔夠深,Tony特別載我走番轉;我沿途一直揸實扶手,因為佢嘅加速力真係好瘋狂;輕輕踩油,一股強力嘅推背感就即刻湧現,嗰種感覺仲勁過飛機起飛!而中間嘅雙出式尾喉,亦都不斷傳出陣陣沉實嘅咆哮聲,愛揸跑車嘅人一定會被呢把咁悅耳嘅聲音吸引。
empty
■全套排氣系統換做Milltek出品,令引擎呼吸更暢順,排氣聲好沉實。
empty
■側鏡面積夠大外,連指揮燈亦獲得保留。
empty
■尾翼為原版款式,毋須特意改裝。
empty
■無論係三幅式跑車軚環定係金屬腳踏,全部都係R32專用款式。
empty
■ESP同胎壓感應嘅控制鍵,繼續藏身喺波棍後方。
強化制動一踩即停
跑完一輪,終可落車稍為休息,順便行個圈睇吓部車仲有咩改咗;外觀同車廂喺整體上都無太大改動,仍然保存有GolfR32本身嗰種跑車Feel,但其實部車嘅「腳」係經過改裝。
首先,最容易睇得出嘅就係4條18吋OZ跑車合金軨,襯落部車到真係型到爆燈。另外前輪嘅制動系統換咗由Brembo特別改良嘅高效能四活塞制動卡鉗連煞車碟,而後輪嘅煞車碟都換埋VolkswagenRacing款式,從而令部車踩停得更有效率,增加安全性。掟急彎唔使驚,懸掛系統都換埋KW出品,加埋18吋高效能輪胎同本身嘅低重心設計,彎路疾走都無有怕。
empty
■咩叫有型有跑格?將套軨換做OZ嘅18吋款式咪OK囉!
empty
■原裝車已配桶椅,承包感已相當不俗。
empty
■前輪制動卡鉗經Brembo特別改良,襯番色㖭!
empty
■中控台設備齊全,仲有銀色按鍵同金屬裝飾。
改裝專家Tony:「散熱最緊要!」
負責呢次VolkswagenGolfR32改裝任務嘅專家Tony,喺同我介紹RufKomprerssor套裝有幾巴閉嘅時候,亦希望藉此提提大家喺幫部車加裝呢類機械增壓裝置嗰陣,要特別留意引擎嘅散熱問題,以免油溫及水溫過高而令引擎故障;為加強部車本身嘅散熱功效,Tony特別將水箱風扇嘅開關時間略作修改,例如好似Turbo車咁,即使喺熄車後仍運作一段時間,從而加強引擎同Kompressor裝置嘅耐用性。
empty
■專家Tony話改裝嗰陣要特別留意散熱問題,以免令引擎嘅耐用性減低。