擁有42吋長腿嘅「美魔女」萬綺雯（蚊蚊），日前為代言嘅光學美容療程再拍攝一輯新廣告，為咗配合廣告主題——回望21歲嘅自己，一人分飾兩角唔在講，仲要好青春咁、着住條短裙仔晒住長腿咁跳吓彈吓，但原來，蚊蚊係有苦自己知：「有個鏡頭講我要一步一步咁跳，代表跨過重重困難，其實我拍得好吃力，因為之前我膝蓋拗柴受傷，為咗遷就角度，來來回回跳咗7、8次，每次跳都係表面開心輕鬆，實際係咬緊牙關去跳。」不過蚊蚊話拍完只係覺得肚餓同腳仔軟。

喺廣告中，蚊蚊嘅演技亦備受挑戰，導演要求佢喺鏡頭前落淚，雖然現場有10幾位工作人員，但蚊蚊極速入戲，佢話：「今次拍攝嘅想法好貼近自己真實人生，過去經歷過難行、難過嘅階段，好彩身邊有好多人支持。」回首21嘅自己，蚊蚊覺得最值得驕傲嘅係：「多年嚟所堅持嘅信念同理念，由21歲至今都冇變，即使有挫折，但仍保持正面嘅想法。」

而今次蚊蚊將部分拍攝酬勞捐畀由魏綺珊及丈夫陳文剛創辦嘅「糊塗戲班無障礙劇團」，為協助22位無障礙劇團團員（包括視障、聽障、動障及健全人士），上個月到瑞典展開為期7天嘅藝術考察計劃，蚊蚊話自己本身都好支持呢個劇團，廣告商亦好有善心咁一齊行善。而蚊蚊喺嚟緊6月會參與參與「糊塗戲班無障礙劇團」嘅舞台劇《天虹戰隊》之演出，以生命影響生命。

緊貼「蘋果VR」熱潮，打開雙眼隨意門，讓「蘋果VR」陪您探索新世界： https://goo.gl/b5RQAB
「蘋果VR」App
App store下載： https://goo.gl/0kW2cK
Google Play下載： https://goo.gl/4K7EHw