40歲日本天后安室奈美惠今日係出道26周年，亦係佢引退樂壇之日，昨晚佢偕同平井堅、BEGIN、MONGOL800及台灣天后蔡依林等在沖繩會議中心作「封咪」演出，連尊尼事務所男星山下智久都驚喜站台，現場消息指，山下與安室拖手合唱，安室仲以暱稱「山P」稱呼山下智久。

安室在告別騷上以《How do you feel now？》作為最後一曲從此告別舞台，佢臨別時亦感謝在場fans，然後向觀眾揮手離去。安室引退望回歸平淡，有指佢係希望可以放下天后包袱，而一直有傳佢會再婚，安室近年同已婚音樂拍檔西茂弘出雙入對，一度傳出緋聞。不過再有消息指，日前宣佈因病而要暫別幕前嘅前尊尼偶像今井翼，當離開尊尼事務所後，即被爆五年秘戀安室嘅消息。據《日刊現代》報道，安室與今井翼是在五年前獲一名外國舞蹈員朋友介紹認識，曾有圈中人目擊安室同今井在西麻布深夜拍拖，還以為兩人經已分手，如今卻不約而同告別演藝圈，令地下情傳得似層層。對於安室突然與今井翼傳緋聞，廣大fans表示尊重偶像，更認為二人已不再是藝人，希望外界可以給予空間。

36歲嘅今井翼同瀧澤秀明於2002年組成「瀧與翼」，2014年今井因為耳水唔平衡，一度要停工休養，復出時體型大變，去年「瀧與翼」宣佈組合活動休止，各自單飛發展，但今井於今年因病復發，決定安心養病，等病癒才再考慮會否復出。其實今井翼都曾與比佢大三歲、avex樂隊Do As Infinity女主音伴都美子曾經拍拖，都唔係第一次發展姐弟戀。

精選娛聞，喺晒《娛果》
http://fb.com/appledailyent