當年今日
關於我們

【翻版關家姐】吳日言當年新秀食詐糊 聽到「吳浩康」以為自己入圍

蘋果日報 2016/08/08 18:28

即時娛樂Kellyjackie香港蘋果吳浩康吳日言小肥九展ShowTime我主場吳凱茵Viu TV

吳浩康(Deep)、吳日言(Yan)、應昌佑、Kellyjackie、小肥等,一班唔係成日有機會作主流演出嘅歌手終於可以重踏歌手之路,表現實力,唔使只係候命大台喇!因為Viu TV 搞咗個節目《ShowTime我主場》,邀請實力歌手同新晉歌手玩PK賽,以歌藝分高下,今日呢班新、舊人就率先喺九展舉行宣傳進行對唱,一眾經驗歌手唱返以前出道不久嘅作品,仍然悅耳,令人勾起回憶。
節目形式會分別喺街頭、餐廳、錄影廠等拍攝,通過觀眾及網民投票得出成績。久沒踏台嘅Yan更拉票話:「我唔係淨係識煮黃金蝦,我仲識唱歌㗎。」
Deep喺台上唱出佢當年名曲《先入為主》更勝從前,Deep表示今次興奮多於緊張,佢話:「自己但求有得唱,喺比拼環節我只可以講經驗俾新人多,會enjoy個節目,本身唱歌能力係一件事,主要想感受返舞台嘅感覺,參加呢個比賽都係為呢樣,已經近五年冇演出,平時唱歌只係喺屋企。」
Deep會積運動極備戰參賽,另一方面有教唱歌同埋喺香港為皇家馬德里進行青年訓練,稍後仲會同一班香港小朋友去西班牙,到皇家馬德里訓練基地習訓一星期。Deep有感而發透露,o依家人大咗,想每樣嘢都可以做得完整。
Yen o依家更添成熟韻味,佢透露最初有掙扎參唔參加節目,佢話:「我唱功較輸蝕,覺得大壓力,喺後台胃痛暈暈地。今日見返好多以前我出道時嘅同事,自己就一個人嚟,唔係一定要有公司至生存到,我會enjoy喺台上唱歌,唔好俾太大壓力自己。」Yan仲分享咗個小秘密,佢曾經參加過英皇新秀歌唱比賽,同Deep同界,當時佢用真名吳凱茵上陣,有次入圍到三十人左右,聽評判宣讀「吳浩康」時,發音同自己名相似,以為可以入圍,點知最終係落敗,呢個秘密喺十六年後先公開同大家講,連Deep都唔知道。Yan暫時自由身,唔會想簽公司,經過今次節目,個心都技癢想再出歌,到時會選擇網上途徑宣傳。