韋斯咸周六喺英超臨尾香，補時4分鐘俾西布朗後衞麥奧尼射破大門而慘被逼和2:2。咁樣唔見咗1分，韋斯咸領隊比歷亦㷫過火屎，搵場邊用嚟收音果支咪嚟洩憤，仲好大力掟爛咗。

比歷控制唔到自己情緒，除咗要賠番支咪錢之外，據聞仲會俾英足總控告佢行為不檢，面臨停賽處分。比歷賽後冇就自己嘅掟嘢行為道歉，仲鬧球證吹得差搞到佢哋贏唔到。呢位克羅地亞籍主帥話：「臨完場先失波被逼和，係人都滾啦！球證吹得好差，吓吓都針對我哋，唔嬲就假。一句講晒，球證今日真係好唔掂囉。」