【慣聚少離多】陳凱琳被爸爸笑似小魔怪 蕭正楠預聽晚同翠如撐枱腳
姜大衛陳凱琳翻生武林黃智賢蕭正楠
蕭正楠、陳凱琳、黃智賢、姜大衛同泰臣等今日為新片《翻生武林》宣傳,蕭正楠同陳凱琳仲着相撲手look,喺吹氣擂台上比武,外型幾搞笑,而劇組特別準備蛋糕,為蕭正楠預祝生日,聽日就係佢41歲正日生日。
蕭正楠今年要開工度過生日,佢都想抽時間聽晚同女友翠如簡單咁食一餐飯,之後繼續忙開工,問到生日願望係唔係同翠如結婚,佢即笑住講唔係,呢啲唔會用生日願望嚟許願,唔想嘥咗,蕭正楠最近拍緊《十二傳說》,直言同女友黃翠如少咗見面,預計拍埋呢個禮拜就煞科,蕭正楠之後就去美國登台。
講到日前播出蕭正楠同陳凱琳倒吊親咀戲,陳凱琳笑晒話有同Daddy一齊睇,雖然播出街只係得一分鐘片長,不過拍攝當日陳凱琳被倒吊咗好耐,眼晴都紅紅哋,反而Daddy好欣賞,不停重睇呢一個片段,讚囡囡好得意,囡囡眨眼嗰陣似小魔怪,之但係男友鄭嘉穎忙於工作,未有時間睇。
而陳凱琳下星期出發去橫店拍攝新劇《包青天再起風雲》拍外景,佢就話同好友譚凱琪緣慳一面,佢過橫店嗰陣,譚凱琪就返香港,問到嘉穎會唔去探班,陳凱琳話媽咪會同行,有媽咪照顧就OK,身邊嘅蕭正楠就笑陳凱琳與媽咪情同姊妹,之後陳凱琳又話嘉穎之後去泰國拍戲,陳凱琳甜絲絲咁話若果有時間會去泰國探班。