鍾楚紅（紅姑）、張智霖（Chilam）、周汶錡、馬詩慧與女兒王曼喜等，前晚在圓方出席《Dior and I》紀錄片首映禮，周汶錡大肚近7個月依然着3吋高踭鞋，認真貪靚。紅姑一襲火紅開胸拉鏈裙造型，事業線若隱若現，性感誘人，她笑言已經打底，胸前拉鏈位置是適可而止：「你哋咁貪心㗎？夠㗎喇！」
提到《Dior and I》是一齣自傳式的電影，問紅姑會否有興趣拍此類電影，她說：「如果部戲係講我自己嘅就唔拍喇，我份人咁悶。《Dior and I》就會拍，一定拍得我好靚，同有靚衫着。」紅姑不打算出自傳，不過，她可以考慮出有關環保和攝影書籍

Chilam地獄式減肥

對於最近有報道指一些攝影發燒友為構圖美觀，破壞大自然，她說：「呢個係一個好差嘅行為，一啲都唔愛惜大自然，應該立例去管理。同埋應該有刑罰。最好罰巨款同要坐監，咁先可以阻嚇到嗰啲冇公德心嘅人。」
日前發哥蒙面在又一城被粉絲捕獲，紅姑笑說：「佢咁高大，同埋佢行得咁張揚，梗係俾人認到啦，我平時周圍去影相都冇人發現我，我有我自己嘅方法㗎喇。」此外，張智霖拍竣電影版《十月初五的月光》後磅數急升，他要為7月演唱會開始減肥，問到他會否效法黎明（Leon）7日靜坐減肥法，他說：「我唔識呢啲嘢，冇偏方，用嘅係最原始方法，就係搵魔鬼教練進行地獄式訓練，食嘢係人嘅原始慾望，寧願做多啲運動，郁多啲，Leon個偏方要請教吓先。」
採訪：譚倩宜
攝影：陳志嵐、仇志德