近年網媒如雨後春筍，唔少網媒都有轉載其他人嘅文章或博客，有時都會因轉載文章出錯或未經授權，搞到俾原作者及其他媒體投訴，不過今次出事嘅網媒竟然係梁粉媒體「港人講地」，仲要連累建制自己友、民建聯立法會議員劉國勳被人質疑抄人嘅人文章。

出啟事致歉

「港人講地」上月14日刊出一篇話係劉國勳嘅文章，題為〈開發這片地　房屋供應不再是問題〉，不過由標題到內容，與「立場新聞」及《am730》博客「金融Loser」喺上月9日刊出嘅一篇文章，幾乎一模一樣，惹來抄襲疑雲。
正當網上瘋狂轉載有關消息，「港人講地」噚日就出咗個更正啟事，話「由於當日網上撈取文章過程出現技術性錯誤」，所以誤將另一博客嘅文章當咗係劉國勳寫，並向「劉國勳、金融Loser、《am730》和《立場新聞》等受影響博客和媒體謹致歉意」。
八方好奇到底呢個「技術錯誤」係點造成，於是問吓主人翁之一嘅劉國勳。佢話本身有喺《am730》寫文，而「港人講地」過往都會轉載，佢留意到同「金融Loser」嘅文章差唔多時間喺《am730》刊登，可能因為咁而發生「撈錯文」嘅情況囉。佢自言十分無奈，躺着也中槍：「明眼人都知點會抄文抄足100%。」仲叫大家番「港人講地」當日嘅貼文就可以發現端倪，因為文章係講房屋，配圖係林鄭見習近平，圖文不符，明顯係貼錯文喎。