【尊重前線】無綫新聞部被嘲CCTVB 柳俊江心痛：美玉變成過街老鼠
蘋果日報 2019/09/14 17:54
1圈圈 星光背後過街老鼠柳俊江CCTVB美玉
近幾年，無綫新聞部被嘲變成CCTVB新聞，更影響前線新聞報道員在採訪期間受到阻撓，柳俊江在商台訪問中坦言感到心痛，他說：「咁當然嘅，如果你係尊重一個自由社會，嚮往一個民主社會，你係應該有所謂尊重言論自由同新聞自由，無論咩立場都好，佢喺前線採訪，你唔應該去阻止辱罵佢。當然每個人立場不同，可能你咁係宣洩咗你對佢嘅不滿，但調番轉頭，你唔鍾意嗰批人喎，你就係唔鍾意冇自由吖嘛，我覺得係好矛盾，當時你會有好多情緒，你會訴諸於口頭或者行動。但調番轉好可悲嘅係，本來係一個好有公信力嘅電視台，somehow我都係喺入面貢獻咗我嘅青春去幫佢建立一個公信力嘅時候，佢到而家好似變成，坦白講，好似過街老鼠，點解會咁呢？！我好痛心，點解管理層會將一個咁嘅美玉，變成而家咁狀況，人人唾棄，痛心係一定。」
柳俊江認為有改善空間，單刀直入說：「做番應該要做嘅嘢囉！」他大讚好多無綫前線人員好有心，例如拍攝暗角七警打人的通宵更攝影師，雖然名不經傳，但一直盡心。而令他最痛心一次，是見到律政司office外有人集會，示威者包圍一名攝影師，並用燈照射他不准採訪，柳俊江說：「嗰位攝影師我識咗好多年，佢係一個好好嘅人，係我一個好敬重嘅攝影師，我哋喺汶川地震一齊採訪，大家點解會將對某一個機構嘅仇恨，放落前線人員身上？！」他直言做幕前記者，因為多人認識，轉做其他工作較容易，反而新聞攝影記者好難，他慨嘆謂：「因為新聞攝影同做廣告或電影攝影，個mind set唔同，惟有喺行內打滾，變咗TVB相對嚟講係比較安穩，但佢哋都會盡能力去做，大家應該要去尊重佢哋。」
柳俊江對無綫前線人員採訪被阻撓，感到好心痛。（無綫電視截圖）
柳俊江接受梁泰來訪問。