當年今日
關於我們

蘭西情報課:擇啱日國際大賽幫信和宣傳

蘋果日報 2004/12/06 00:00


樓盤宣傳活動,成日都要推陳出新,信和置業上水雙魚河御林皇府嘅頭炮宣傳,就揀咗今年香港高爾夫球公開賽嘅場地舉行,重擇啱日子,正值噚日最後一日賽事,又可以順便欣賞呢場國際大賽。
信和置業營業部總經理韓家輝話,御林皇府所在地,喺正上水香港高爾夫球會附近,又撞啱一連四日嘅比賽,所以就揀高球場搞宣傳。而且,信和重有份贊助今年高球公開賽,喺場內有個自己嘅貴賓廂,真係唔可以浪費。
另外,附近重有賽馬會嘅俱樂部,韓家輝話,高球會同賽馬會會員,都係目標買家之一,個盤暫時已經收到七、八十個查詢。
御林皇府𠵱家重等緊售樓紙,韓家輝話,有機會喺今個月內開售,做佢哋公司今年嘅壓軸樓盤,意向售價維持一萬蚊呎。佢話,呢個價錢,係參考山頂南區嘅獨立屋。

銀行加薪職員買樓
各界齊齊吹捧嘅經濟復甦,暫時只係局部行業受惠,銀行係其一。利記何華安話,剛剛做咗張單,個客係某大銀行櫃枱職員,收到公司加薪通知後,喜極而扑槌買樓,用咗一百零五萬,買入一間天水圍嘉湖山莊麗湖居七百呎。
呢個望內園景嘅單位,係五座低層C室,每呎一千四百八,比市價平咗五個巴仙。
普羅打工仔,捱咗幾年裁員減薪嘅黑暗日子,終於守到個市好轉,可惜唔係每一行嘅老闆都咁有良心,明白甘苦與共的道理。
投資者走唔切炒燶
十月賣貴地,成為城中大小炒家興奮劑,初哥老手齊齊入市炒鑊甘,不過,亦因為呢種羊群心理,令好多人忘記咗年尾例靜,買咗貨又走唔切,結果喺前景向好嘅情況下炒燶貨。
最新一單飲恨個案,發生喺元朗YOHOTown,投資者十月以一百四十五萬購入九座中低層D,諗住炒番轉,點知等到十二月,都未有人接貨,由於上會死期到,只好降低叫價斬纜。
終於以一百三十五萬急急放手,個幾月蝕咗十萬,個單位五百四十五呎,每呎近二千五,平過市價五巴仙。

新中武漢場佔地利
新世界中國武漢新世界中心,佔地四十萬呎,相等於兩幅何文田天光道地皮咁大,會起寫字樓、酒店、商場、住宅與步行街。
項目地大,前身重好巴閉。原址叫武漢飯店,係中央領導人到訪武漢嘅指定酒店,地位超然。地利當然有,坐落全市最繁華核心地段,全國營業額最高嘅百貨商場,武漢廣場喺正隔籬。個場去年生意二十二億人民幣,全國之冠。
新中希望可以分佔到武漢廣場嘅消費力,除咗商場,再起多條全市最長,達三四百米嘅步行街搶客。
電郵地址:[email protected]
empty
御林皇府喺高球比賽期間,設包廂宣傳,對出重有外籍小朋友客串表演。
謝榮耀攝