本田Stepwgn用家報告：
引擎慳油車廂大
MPV市場可算係各大車廠必爭之地，故此佢哋都各自推出一款、甚至係多款型號「參戰」；而今日《用車報告》主角本田Stepwgn亦係「參戰」車款之一，雖然地位因廠方推出全新Stream而略有動搖，但憑藉其獨特嘅方匣子造型、闊落兼實用嘅車廂配搭，以及一台2.0公升i-VTEC偈所提供既慳油又好力嘅表現，仍廣為車迷所受落。唔知今日呢部Stepwgn嘅主人梁先生對其有何評價呢？大家不妨一齊嚟睇睇！
記者、攝影：郭信強
「上落方便為最大優點......」
曾經駕駛不同類型車款，並擁有平治S320及保時捷Boxster呢類名貴汽車作座駕嘅車迷梁先生，點解會揀實用路線嘅本田Stepwgn作為座駕呢？相信大家都與筆者一樣對此感到興趣；而梁先生畀大家嘅答案係：「其實三部車之中我用得最多會係呢部本田Stepwgn，貪佢上落方便之餘個車廂又夠闊落嘛！而且部車外形設計得四四方方，用得到嘅空間較一般MPV來得更多，單係呢點已經吸引到我去揀佢啦！」從以上答案睇，都應該知道梁先生選擇Stepwgn嘅原因啦！
「加埋包圍型得多......」
梁先生不但對呢部Stepwgn「寵愛有加」，同埋極之喜款佢嗰個四四方方嘅造型之餘，而且重特別為其加裝一套原廠Modulo車身包圍，從而令到部車望落與其他同款車輛別樹一幟，同埋增添有一份活力感外，車身兩旁裙腳配搭，重能夠於下雨天利用行車時所產生嘅氣流將雨水往下壓，輔以闊大門邊鏡組合，讓駕駛者更能清楚察看到車尾及後方嘅情況，令行車更安全；響高速行車時，而17吋胎軨亦能有助增強行車穩定性呢！
「設備齊全空間好大......」
若果將本田Stepwgn，與豐田Alphard及日產Elgrand呢類豪華MPV相比，可謂予人有越級挑戰之感，但梁先生卻不大認同：「無可否認，呢部走實用路線嘅本田Stepwgn，論豪華同舒適程度都要較豪華MPV要來得遜色，但所能夠畀到車上每位乘客嗰份空間感，豪華MPV卻未必及得上Stepwgn；我不如同大家舉一個實際嘅比喻，就係Stepwgn車廂空間大得連成人可隨意在車內走動，小朋友站起來玩耍亦不成問題，而豪華MPV就能夠為乘客帶來舒適嘅乘車環境，但未必能夠帶給你有如一家大小在郊外玩樂嗰份開開心心嘅效果。」
本田Stepwgn小檔案
一向以方匣子造型示人嘅本田Stepwgn，自新一代型號推出以來，一直廣受用家歡迎；然而，廠方為增強佢響市場上嘅競爭力，早前更為其推出Facelifted新版，雖然新車整體造型沒多大改動，但就改換上極富動感嘅鬼面罩，以及車身兩邊嘅黑膠裝飾，改為與車身同一色調，望落更見有一份吸引力。而寬敞闊落同設備齊全嘅車廂配搭，以及動力輸出強勁嘅2.0公升i-VTEC引擎，亦係新車賣點所在呢！
規格
引擎：1998cc直4DOHCi-VTEC
馬力：160ps/6500rpm
扭力：19.5kgm/4000rpm
尺碼：4670×1695×1845mm
軸距：2805mm；車重：1510kg
新車售價：$199,000起（合群汽車：23802231）
引擎比同級慳油好力
「其實響買呢部Stepwgn之前，我都曾經有考慮過同級水貨嘅豐田Estima同日產Serena，當中又以Estima3.0及Serena2.5型號嘅售價最為合理；但後來行經本田Showroom時，就毫不猶疑走進去試駕Stepwgn，試車時覺得佢所配用嘅嗰台2.0公升直4i-VTEC偈，動力輸出充裕唔在講，用落之後重覺得佢好可靠，而且耗油量亦唔係太高，響香港呢類路面環境使用絕對適合不過，最緊要係連牌費都可以畀少啲嘛！」梁先生笑着說。
用家大募集
如果你係車主，而座駕又已落地三個月或以上，無論是讚是彈，我哋都願意將你嘅心聲寫成《用車報告》與廣大讀者分享；有興趣嘅朋友，可利用以下方法與我哋聯絡。
傳真：27420542
電郵：[email protected]
郵寄：香港將軍澳工業村西駿盈街八號，《蘋果日報》副刊「車天車地」版「用車報告」收
（來信請註明姓名、年齡、聯絡方法及車輛型號）