威震研究界嘅智經研究中心雖然連寫字樓都未裝修好，但係由於人強馬壯，班財主佬都要另眼相看。主席攞命陳曾經係煲呔競選辦公室嘅秘書長，又係肥龍契仔，由佢牽頭，真係畀錢都唔使多問原因。當然大家最感興趣嘅係連離開咗官場好一段日子嘅「骨精強」黎慶寧竟然肯出山，做咗中心嘅顧問。
黎慶寧（Peter）何許人也？皇仁校友、AO精英、肥彭愛將、保安局前局長，以計仔多、做事乾淨利落、效率高出名，兼且心口有個勇字，回歸後一年，與同是AO出身嘅太太蕭寶珍及兒子舉家移民澳洲，棄高官歸田園，若非如此，葉劉未必有機會上位。

今年開始食長俸

Peter離開政府之時只有四十七歲，未夠鐘食長俸。時間過得好快，今年七月佢老哥滿五十五，每月開始有糧出。當年佢忽然劈炮唔撈，坊間好多傳言，相信同佢個位太敏感，而佢老哥又有所為有所不為有關。點都好，今次佢回流返港，肯定係想有所為，唔想喺Perth日日對住啲羊度過下半生。上個禮拜陳太辦喪事，Peter兩夫婦都有去致意，八方見佢好sharp，一啲都唔似退休人士，對香港形勢極了解，亦唔似移民多時out晒嘅人。
早前有傳聞，Peter農曆年同太太返咗香港，仲買咗間屋，八方於是問佢係真唔係，原來佢真係回流，不過就冇買屋，只係喺大坑道租咗層樓，𠵱家仲添置緊傢俬。Peter仲話，佢因為同陳德霖份屬師兄弟，老友記叫到，咪做吓大義工。咁係咪同煲呔助選？佢梗唔認，話中心研究長遠策略，一兩年先有結果，煲呔都選完啦。

問責官三聲No

八方一向都知Peter身在澳洲心在港，對香港十分關注，佢形容肥龍為煲呔拆咗西九個炸彈，就好似天上已滿布黑雲，係時候要落場大雨，然後雨過天青，𠵱家就要問香港下一步應該何去何從（Wheredowegofromhere）？既然回流，香港澳洲兩邊住吓，會唔會復出做問責高官呢？Peter連續講咗三個No！No！No！一定唔會咁話。
依八方睇，Peter做唔做官都唔會悶，因為香港朋友眾多，加上明年皇仁慶祝一百四十五年校慶，校友想搞大佢，所以大把嘢做。皇仁呢幾年最威，肥龍、皇仁龍、攞命陳、湯大狀、周一嶽、林煥光、連煲呔身邊嘅陳羿都係皇仁仔，真係未試過咁巴閉。


爆料熱線：29290000、27860099
報料傳真：26239278
報料電郵：[email protected]