今日（17日）沙田舉行七草三泥賽事，草地用最狹窄之C加3欄，度地儀指數2.70，場地掛牌為好地。今日將不會進行壓地。

一年前的12月17日田草賽事亦係用C加3欄，當時度地儀指數2.7及掛牌好至快地，當日大利前置馬，八匹草地頭馬，六駒沿途守前四位建功，「凱旋星光」、「宇宙車神」及「再開心」更放頭帶到，具前速之馬可優先留意。

今日第五場「君達星」上仗正是田草C加3欄1200米一放到底開齋，贏完等番同一移欄再跑，睇部署有心添食。

另外，第六場「勝利之星」是全場唯一贏過田草C加3欄1400米之參戰馬，老馬憑較佳場地性能可爭勝。

泥地方面，今日硬度計指數9.04及掛牌好地。今日三場泥地賽均1200米，雖然最近有「藍天堡馬」後上贏此程，不過整體上前置馬仍然佔優，所以今日第三場「天賜寶」、第四場「豹子頭」及第九場「上簽」等擅泥地之快馬可捧。