現代社會講求增值,連樓盤用料都唔例外。長實東涌映灣園悅濤軒,雖然發展到第三期,大家以為同第一二期相差無幾,點知,噚日長實向傳媒介紹,今次用料增值唔少,好似浴室裏面有塊大玻璃鏡,鏡上面裝有垂簾式壁燈。
長實話,咪以為呢類潔具只供參考,今次係隨樓附送,但就唔會白紙黑字,寫明喺售樓書內,重有花灑頭等潔具,都一樣增值,有興趣嘅買家,想知重有冇其他嘢附送,記得要問清楚。
雖然悅濤軒主要售樓處設喺中環華人行,但為網羅客源,紅磡國際都會商場,有個小型售樓處,重有示範單位。長實話,今次用百二萬裝修,以喜力啤酒做主題,單位近七百五呎,成屋都係啤酒樽同啤酒裝飾擺設。
發展商講,港島東同九龍東業主或租客,今個禮拜五前預先登記,買悅濤軒有九八折。
和黃珠海樓賣得
珠海海怡灣畔,賣樓招數認真多,上個禮拜日,搞咗個VIP卡主優先揀樓活動,聽講,反應都幾好,一日賣出逾百五伙。可見發展商和記黃埔地產,捕捉到買家心理,手法相當成功。
發展商重透露,海怡灣畔會調整銷售策略。咁係咪暗示會加價呢?
較早時,深圳有啲樓盤,一天沽出四五百伙,睇落銷情重熱烈,但因兩地同香港嘅距離有別,難以直接比較。
北京盤宣傳
內地市場極具發展潛力,吸引唔少外資東來,由台灣、美國、香港同內地組成嘅北京信任集團,係專門喺內地投資房地產嘅基金,佢哋北京東部大湖山莊項目,佔地近二百六萬呎,建逾百五幢別墅,舊年底對外銷售,已經賣出逾半,發展商計劃請香港傳媒實地睇樓,增加樓盤曝光率。呢類活動看來陸續有來。
呢個基金九二年進軍內地,投資物業有公寓、寫字樓、住宅、別墅同商場等,涉及樓面逾八百六萬呎。
地廠拆細盼租貴啲
工業區地廠,一般好大,要租畀單一租客,租值自然較低,所以,有業主間細出租,希望收多啲。
中原李彥樺話,觀塘鴻圖道世紀工商中心九千六呎地廠,原本做食肆,舊年獲投資者斥逾七百二萬交吉購入,分間為三個單位招租,其中2C,千一呎,好快就租咗畀時裝店,呎租十七蚊,比食肆嘅六個八為高。
餘下兩個地廠,2A五千五呎,叫價月租五萬五,2B三千呎,月租叫價三萬四。若全部租出,扣除冷氣同管理費,月收九萬幾,比之前高近四成四,回報十五厘。