韓國男團帝國之子（ZE:A）成員任時完近年轉型為演員，2014年憑韓劇《未生》彈出，早前與允兒、洪宗玄合作新劇《戀愛中的王》。不過現年28歲嘅佢已屆韓國入伍當兵嘅年紀，今日任時完就宣佈將於下月11號以現役兵身份服役。

據悉任時完將於下月11號喺京畿道楊州新兵教育隊以現役身份入伍，接受新兵基礎訓練，之後服役21個月。而任時完亦透過所屬事務所表示：「為咗盡到保衛國家嘅義務，我暫時離開各位，雖然心裏面好遺憾，但解決咗一直拖住嘅問題，亦覺得好暢快，希望粉絲見到我成長嘅一面，呢段時期請等待我哋再次見面嘅日子，要注意健康，我愛你哋。」向粉絲表示心意。

而任時完喺入伍前會繼續完成其他工作，不過所屬事務所就指未必會舉辦粉絲見面會，即粉絲冇機會喺偶像入伍前見多次，令粉絲大呼可惜。