葡超球隊士砵亭周三宣佈，已經借得皇家馬德里後衞法比奧干查奧，據報皇馬仲需要支付大部份薪金；干查奧離隊後，皇馬葡萄牙幫就得番基斯坦奴朗拿度一人。

葡萄牙國腳法比奧干查奧2011年由賓菲加加盟皇馬，但一直受傷患困擾，而且左後衞位置又唔夠馬些迪爭，長期都做後備，上季西甲更加只得3次上陣機會。29歲嘅佢同皇馬仲有一年約，年薪仲高達350萬歐元（約3千萬港元），皇馬將干查奧借去士砵亭，都仲要俾200萬歐元，尾數150萬歐元就由士砵亭出番。隨住比比加盟土超比錫達斯，宜家皇馬一隊得番C朗一個葡萄牙球員。