跟鄧梓峰好似孖生兄弟撞樣嘅旅遊達人項明生，上個月開始為香港開電視主持日本深度遊新節目《明治憑甚麼》，趁2018年係日本明治維新150周年，去鹿兒島、長崎、下關、萩市、京都、東京、盛岡、青森、函館、札幌等15個日本地方，介紹明治維新成功因素，亦都因為佢以日本明治維新150周年做主題，吸引到日本NHK電視台派員嚟香港訪問佢㖭。

呢個節目播出以嚟唔單只口碑唔錯，而且更成為香港開電視以嚟最高收視節目，所以今日香港開電視就喺尖沙嘴搞咗個傳媒飯局，由有線寬頻營運總裁梁淑儀頒咗個「深度旅遊王」畀項明生，項明生仲即場宣佈嚟緊會開拍第二輯㖭。

有份構思同引入《明治憑甚麼》嘅香港開電視創作總監王喜，今日都有份出席飯局，佢同項明生一齊分享喜悅，不過王喜講講吓，竟忽然宣佈辭職。佢話之前做調查，奇妙電視開台18個月，2,000人當中只有300幾人知道有奇妙電視，但轉咗香港開電視2個月，已經有1,600人知道呢個電視台，佢覺得係時候功成身退，所以決定辭職。王喜突然即場宣佈辭職，事前原來冇人知，所以連一班高層都O晒嘴。

《蘋果》問王喜點解突然辭職，佢話:「呢一年時間都算成功領導個新台，功成身退，我想做一個華麗轉身，我辭職都要3個月嘅，嚟緊我會有新工作，但暫時唔方便透露。」據《蘋果》了解，王喜離職係因為工作方面嘅人事問題，令佢覺得冇癮，所以決定辭職。

精選娛聞，喺晒《娛果》
http://fb.com/appledailyent