歐陽偉豪（Ben Sir）由大學講堂，到上電視做節目，再到今日走上九展開一連二場Talk Show「Ben Sir開Show」，而今晚首場騷就全場爆滿。

Ben Sir個騷係8點38分開始，佢着波點西裝喺鋼琴live伴奏下唱出《浪子心聲》......講書就叻嘅Ben Sir，呢次演唱可以話係遊走喺走音邊緣，跟住同觀眾大玩粗口諧音「鵰」、「好L柒」同「抵你老母威」等等，好有佢嘅本色。

講到o依家好多家長擔心仔女患有「粵語癌」，所以興起「ABC」即係「Anything But Cantonese」，好似「PooPoo」同「ViVi」取代「痾屎」同「痾尿」，寸怪獸家長唔俾小朋友學粵語。

接住輪到班長蘋蘋出場，佢話：「我跟你學咗廣東話好耐啦，你覺得我學廣東話音部好唔好呀？」全場大笑，Ben Sir話：「我係好鍾意你廣東話發音嘅部份嘅。」之後Ben Sir教廣東六聲聲調，又教中國數目字「柒」同「玖」。

講到三位香港特首，Ben Sir教如果同嗰個人好熟，可以疊字咁叫，例如「董董」、「權權」，去到「英英」，Ben Sir即刻話：「我同佢唔係好熟㗎咋，保持一段距離。」然後叫全場一齊大叫「娥娥」，Ben Sir話：「希望佢老人家聽到啦。」

Ben Sir之後教作歌仔，用《上海灘》嘅音樂唱：「麥美恩...做愛神...」邀請麥美欣出場。然後Ben Sir開始講踩界嘢，包括一啲好出色嘅網民名例如：「傷莖娛賓」、「污肛自吻」同「蒸翼」等等。麥美恩同Ben Sir又改《在森林和原野》歌曲，將首兩句改成「是狗也是頭 是狗頭 四面奔走 左握香蕉 右握蝦條 做愛運動人」……即係，又玩諧音講鹹濕笑話。

值得一提，呢場騷全場爆滿，啲觀眾真係俾足面喇！