梁詠琪(Gigi)今日到中環ifc為品牌AIGLE新店擔任揭幕嘉賓，獲混血小朋友送上精美鞋履用品，夠Gigi一家三口享用。Gigi自稱執喼達人，一家大細外遊所有旅行喼都由她負責，自己執喼執咗廿幾年，每次外遊執喼份量都好多，因為自己屬於穩陣型，乜嘢都會帶，例如小朋友張披、枕頭都會帶。

Gigi透露囡囡愛襯衫鍾意公主服，但她拒絕買公主衫給女兒，佢話：「等佢大個啲先，唔想佢細細個以為自己真係公主，要畀佢知道就算做公主都要執嘢洗碗，灰姑娘都係要掃地，學習公主優點，但無法阻止佢接觸公主。」

講到教育問題，Gigi希望未來四至五年都會留喺香港生活，女兒現年兩歲半，最想佢多學習中文，未必一定要讀國際學校，而在家中自己扮演角色好重要，佢話：「有時要扮唔識聽佢講英文，堅持佢講中文先應佢，會陪佢睇中文書，希望讀到傳統學校同幼稚園，我驚個女第日大個會埋怨我中文唔好，沖涼親子時間就係我同阿女講得最多中文。」