受歡迎嘅電影好多時都會繼續拍續集，好玩嘅Game都係一樣，集合大量動畫機械人人物嘅《超級機械人大戰》系列，自從1991年首次現身到𠵱家，已經喺唔同嘅機種上面推出咗超過30部作品，受歡迎程度絕對係遊戲界嘅經典，可惜呢次推出嘅《第3次超級機械人大戰α－－往銀河的盡頭》已經係《機戰α》系列嘅完結篇，各位Fans千祈唔好錯過呢個最後機會呀！記者：梁瑋瑜

今次PS2方面為咗隆重其事，重同時推出咗一張8MB嘅記憶卡連埋貼紙，十分之精美，可惜香港行貨方面暫時未會推出，有心嘅Fans可能要諗吓網上訂購，或透過相熟Game舖向日本訂貨等其他辦法喇！

32部機體史上最強

鍾意玩《機戰》系列嘅玩家，多數都係機械人嘅Fans，今次《第3次超級機械人大戰α》參戰嘅機體連同BANPRESTO原創機體多達32部，絕對係歷來最高，當中除咗有大家熟悉嘅《高達》系列、《新世紀福音戰士》、《三一萬能俠》、《超時空要塞》同埋《勇者萊丁》等等之外，重有首次登場嘅《高達SEED》、《勇者王我王凱牙FINAL》等，可以話係有史以嚟最熱鬧嘅一次，而且喺畫面方面亦都比起之前嘅作品更加有水準，畀到玩家一個好壯觀華麗嘅感覺，令人十分驚喜。

最後一戰保護地球

今次嘅《第3次超級機械人大戰α－－往銀河的盡頭》係第一部PS2嘅《機戰α》系列作品，亦會沿用番《機戰α》系列嘅故事劇情，玩家嘅任務係喺地球圈度守護住地球，抵抗STMC宇宙怪獸嘅侵略，打完之前嘅兩次機械人大戰之後，地球有過一陣子嘅和平，但係到咗新西曆189年，喺地球外圍又出現咗一班叫做CrossGate嘅神秘軍事組織同埋外星人，喺呢個時候玩家就要為地球進行最後一戰，為地球人帶嚟永遠嘅和平。

新增遊戲系列自動編隊

遊戲嘅玩法同之前差不多，都係以回合式戰棋嘅方式進行，玩家可以選擇一對一單獨作戰，出盡自己一方機械人嘅強勁招式嚟同呢班黑暗勢力作戰，如果大家記性好，都應該記得上一集加入咗新嘅戰鬥系統「小隊系統」，可以自由調配組成每一隊嘅四隻機械人，今集除咗會繼續採用呢個系統之外，重加入咗新元素「自動小隊系統」，玩家可以根據每隻機械人嘅「平衡」、「威力」同埋「速度」呢三個條件俾電腦幫你自動編最精銳嘅部隊，另外如果玩家有番咁上下經費，重可以根據更仔細嘅條件例如「攻擊力」、「防禦力」咁自動編隊，比起過往幾集更加精采！

Profile：

類型：SLG
機種：PlayStation2
售價：$575
SonyStyle（23452966）