早前有傳民協前立法會議員馮檢基有意退出民協，並再度參與選舉。馮檢基今日獲民主黨前主席劉慧卿邀請出席網台節目，阿基被卿姐問到會否退黨時左推右推冇正面回應，又唔承諾唔再選，幾乎全程被卿姐鬧爆。

卿姐不愧為前記者，第一條問條已經單刀直入，問阿基點解10日前臨時取消疑似宣佈退黨嘅記者會？阿基解釋：「有啲題目本身想同大家傾下討論下，但係好『忟水』，有啲事要處理，有啲嘢未完喇，所以要押後」；卿姐再追問「係唔係退黨呀？」阿基就答：「我而家仲係民協中常委。」又推說係傳聞唔答。

聽見阿基左推右推，卿姐即時反駁：「咩叫點答啫，唔係咪唔係囉」、「喂阿基，我有時都有啲人問過我傳聞㗎，一句話唔係就已經無咗㗎喇，你有無聽過空穴來風？」再被追問係唔係有機會退黨，阿基指，「每個人都有機會入有機會退」，卿姐反問：「唓，你唔好問我係唔係有機會退民主黨？」

阿基唯一願意講多兩句嘅就係佢本新書，將會喺7月書展推出，大爆書中會講過去多年政壇故事，形容自己係「擺事實、講道理」。佢阿基透露去年九西補選被迫退出唔做PlanB，對於民主派同本土派開會唔叫佢，之後通過傳媒佢先知道感到好失望，覺得傳統民主派係「開會開到馮檢基退為止」。

阿基話退出唔做Plan B後先知道傳統民主派中民主黨同長毛都撐機制時，卿姐又按奈不住提出質疑：「你又唔係唔識其他黨派，你幾簡單打個電話又好，WhatsApp又好，係咪咁呀？咁你都唔去問，我覺得你好兒戲囉！」阿基試圖解釋係因為《明報》記者同鄭宇碩話主流民主派要佢退，卿姐再發炮：「《明報》梗係唔代表民主派喇！」

講到阿基係唔係永續參選，阿基就話「而家不考慮」，卿姐再次火滾：「而家不考慮？咩你講到咁化學㗎，一係就唔考慮喇，咩叫『而家不考慮』？你而家整本書，但係本書下個禮拜就整完，即係你下個禮拜就考慮喎？」卿姐又問佢2016年點解唔支持莫家嫻反而支持譚國僑出選九西，「點解你唔畀後生出呢？」阿基就話嘞，係黨內機制喎，卿姐則指：「我而家做民調我都贏喇，咁又點啫？我哋都希望個個組織都有生命力，係畀啲後生會去參加，你係咪仲想去選呢？」