民主路，香港人由天光行到天黑，居然行咗入倔頭路，叫做苦路都不為過。有基督徒團體發起今晚喺立法會外仿效耶穌當年被釘十架嘅苦路，一齊回顧吓香港人爭民主嘅艱辛歷程，邀請巿民同信徒參與。
幫手寫呢14處苦路嘅善樂堂林國璋牧師話，苦路由中英聯合聲明、爭取88直選講起，仲會提到人大否決07、08雙普選，同今次政改，全部配合番當年耶穌嘅經歷，好似耶穌遇見母親，就會配番居港權事件；80後保衞菜園村，就會配西滿幫耶穌揹十架。預計第12站就係立法會通過民主黨方案，即係耶穌死在十字架上。林國璋話第13、14處諗住寫民主路以後點行落去，點知諗到噚晚到未諗掂。