剛周日（16日）沙田賽事，港產騎師大爭口氣，潘明輝、楊明綸起孖，梁家俊亦贏一場，比近期潘頓、莫雷拉話贏就贏，總算舒緩外籍騎師壟斷局面。

練馬師方面，華人倉口更以大比數九比二拋離外籍馬房。當中，容天鵬中三元固然巴閉，沈集成起孖亦唔曳。

講起沈廐，不得不提爆大冷的「勞動創造」，眾所周知C加3跑道大利貼欄馬匹，尤其是1200米。

此駒四叠轉彎蝕位輸形勢，居然可以在大外檔一口氣逢馬過馬，爆62倍大冷門跌到一地眼鏡碎，計前日乾快地步速偏快，比人鬧追寶尾都係咁話，下仗一定追多次！

有讚自然有彈，要彈的必定係田泰安，全日騎十駒表現患得患失，只得三個第三，大熱門「寶山鷹」倒灶，全程騎姿左搖右擺，最後50米又幾乎甩韁繩，一鞭未打過之下跑第五。

騎者似乎被競賽小組關注次數太多，又或者上周三（12日）因又跌鞭被罰錢而有所顧慮，失去過往如狼似虎的推騎步韻，大熱門連位置都不保。

跟住再數「熱血鬥士」，5檔起步慢閘，全程四叠望空，入彎五叠，直路200米收韁包尾，唔知賽後解鞍時，告東尼會用英文、葡國話，還是用中文向佢興師問罪呢？

-----------------------------
你撐蘋果 我捐$1
支援反送中抗爭者