由崔丹尼爾、朴恩斌及李智雅主演嘅KBS新劇《今日的偵探》，上周首播後掀起一股驚慄劇熱潮，港迷可於Viu煲劇平台逢周三、四追睇。

《今日的偵探》講述捉鬼偵探李多日（崔丹尼爾飾）跟熱血偵探助手鄭汝蔚（朴恩斌飾）捲入連串靈異案件，背後均與神秘紅衣女鬼（李智雅飾）有關，而劇中接連出現嘅恐怖場面，更突破韓劇嘅驚嚇尺度。

入行14年嘅崔丹尼爾一直以招牌四眼造型示人，首度飾演偵探嘅佢，今次就罕有地除下眼鏡及留咗鬚根，擺脫一貫斯文書生形象。佢飾演陸軍出身嘅李多日，因揭發軍中暴力與貪污事件而遭免職，從而踏上偵探之路。

朴恩斌飾演嘅偵探助手鄭汝蔚，就係為咗查明胞妹死亡真相，其妹於一個月前自殺，鄭汝蔚於事發現場見到紅衣女鬼，堅信胞妹死因與女鬼有關，而於李多日幫助下，佢亦慢慢揭開妹妹生前曾遭餐廳經理性騷擾一事。

新劇含驚慄懸疑情節，首集講到兒童失蹤事件，於廢屋木箱中驚現一雙血紅眼睛，女教師幻覺中見到校長頭部180度轉過來，以詭異聲線表示：「今日要殺咗佢哋！」女教師上吊自殺嘅駭人死相，仲有餐廳經理撞車入院後，於病房見到血淋淋嘅白布，畫面均觸目驚心，勢要令觀眾嚇破膽。

不過最令劇迷震驚嘅係，原來男主角李多日於第二集就被賜死。佢追查兒童失蹤案期間，遭疑犯用槌仔襲擊及活埋，艱辛地由泥地爬出嚟繼續查案。第四集結尾，李多日於天台伸手想救自殺嘅餐廳經理，卻驚覺捉唔到對方，先知道自己已經死咗。劇情出現大逆轉，令觀眾大感驚訝，更戲言佢係史上最早死嘅男主角。

精選韓流，喺晒《娛果》
http://fb.com/appledailyent