基金K放假三個月，眨下眼就完，不過基金K重唔捨得返工住，問佢有乜感受，基金K話：「過去三個月，盡量避免睇財經報紙、接近市場，等個腦袋暫時休息，希望放假之後，能有一個新鮮見解，過往三個月過得好寫意，但銷假期近，職業病又發作，前一輪睇番報紙，知道A組經紀嘅市場佔有率上升，B組、C組經紀佔有率下降，個腦又開始思索呢個數字有乜意思。」

桐油埕始終裝桐油，冇得講，既然基金K已經睇番報紙，又唔怕煩吓佢噃，於是問：「喺放假期間，股市大幅反彈，成交大增，你覺得反彈完畢未呢，還是股市會繼續升？」
基金K話：「A組經紀係外資、大經紀，佢哋市場佔有率上升，即係話機構投資者大戶踴躍入市，B組、C組係本地經紀、中小經紀，佢哋嘅市場佔有率跌，即係話散戶重未瘋狂入市。以過往經驗睇，當C組經紀嘅市場佔有率上升嘞，就係散戶入市，大戶、基金出貨嘅先兆。睇嚟恒生指數仍未到頂，重有得去，我返工之後，重有賺錢機會！」
咁講法，散戶咪永遠係大戶點心，鋪鋪摸頂做大閘蟹？基金K笑曰：「唔係我公司肯畀我放三個月假喎！」基金K頭腦冷靜夠謹慎，又不斷讀書；追求新知，佢話要放假充電，係老闆都立即應承啦。