阿澤杜汶澤同太太田蕊怒妮每年都會到美國渡假充電，作為貓奴的二人，每次出埠都會將愛貓Momo寄養在朋友家。不過今年阿澤就選擇了寄養服務，幫襯江若琳（Elanne）經營的貓貓酒店。阿澤今日在網上貼了兩張接愛貓回家的照片，更不忘幫好友Elanne賣廣告，阿澤留言「酒店老闆娘仲專登返嚟同Momo講拜拜㖭！果然係五星酒店呀吓......」

阿澤今日接受電話訪問，講起愛貓Momo首次寄養：「響度住咗兩個禮拜，之前我同老婆去親美國都會將佢放響朋友屋企，不過Momo自從有咗心臟病之後，每日都要食藥，所以只決定放佢響貓酒店，間酒店有閉路電視，我哋可以廿四小時睇到Momo，仲可以同佢講嘢，所以我響美國都成日用閉路電視睇佢。」

老闆娘Elanne話今次要多謝杜生、杜太幫襯，她以短訊回覆表示多謝阿澤兩公婆信任，叫他們不妨多點去旅行，她說：「我好唔捨得呢個女皇，雖然佢成日蝦我，下次麻煩叫佢輕手啲。」照片中見到Momo臨走時，都沒有放過機會和這位過去兩星期有幫牠清洗貓沙盤的「剷屎官」Elanne玩。

---------------------------------------
7月4日起 《蘋果動新聞》只限升級壹會員閱覽
繼續撐蘋果！