特首辦係喺上周五刊登呢個招聘廣告,話要請研究主任。做咩㗎呢?原來係協助研究及制訂政策、整理公眾意見、籌辦宣傳項目及活動,以及草擬演辭等。呢個位按非公務員合約條款聘用,為期兩年半。
無啦啦每個月用成4萬幾蚊開新職,狼英梗係被認定另有所圖啦!咁啱呢個時候,政圈盛傳唔少梁粉,幫緊曾係狼英候任特首辦項目主任嘅前共青團成員陳冉搵工,驚呢位小花冇糧出好陰功豬。又難怪有政界中人質疑狼英,可能唔想做負心漢,特登開個靚位安置陳冉。
特首辦發言人證實職位係新開㗎;至於有「用人唯梁粉」往績嘅狼英會唔會親自篩選?發言人話招聘過程會按政府相關規定進行,特首辦會以「用人唯才」 宗旨揀人喎!
狼英有心,都要睇吓小花有冇意嘅。八方噚日打過電話畀陳冉問佢最新狀況,佢用依然甜美嘅聲線回應,自己仲係商交所職員嚟㗎,仲未劈炮!咁有冇糧出、有冇諗住轉工?佢一概笑笑口話唔評論,多謝關心喎。
mailto:
[email protected]