【本報訊】「60後」的球星山度士，昨日與「80後」o靚模周秀娜（Chrissie）齊齊擔任尖沙嘴一足球專門店的開幕嘉賓，去年10月剛為人父的山度士除了大晒腳法，還當眾大讚Chrissie又靚又正，更表示不介意免費私人傳授球技。
Chrissie昨日收起性感，以一身體育服出席活動，但仍難掩其玲瓏浮凸身材，加上短褲下的一雙修長美腿，與其他模特兒行catwalk時仍是最索一個。連已有靚靚老婆和可愛女兒的山度士，在場邊也「金晴火眼」，更公開讚：「靚啊！正㖭啦！我其實有儲佢啲相，買唔到佢個攬枕，應該整多啲貨！講笑啫！不過呢個小妹妹真係好靚、好得意。」

周秀娜：冇時間學

山度士又表示，不介意免費教Chrissie兩招：「如果佢想踢波，我會私人免費教，有佢學踢波，肯定可以令多啲香港女仔鍾意足球。」
一代球星「送秋波」，但Chrissie卻不太領情：「知山度士係香港足球先生，第一次見佢真人，覺得佢好nice，扭波好勁。不過我做嘢好忙，冇乜時間（學踢波），等第日有BB先搵佢教啦。」