中央政策組嘅頭頭劉兆佳舊年錯估上街人數，更估唔到有咁多青年人會走出嚟，八方聽聞佳叔雖然有啲後知後覺，但係都知要急謀對策，最近有意請兩位年輕人（一位讀緊大學，一位剛踏出社會工作），做CPU嘅兼職顧問，等特區可以把握到青年人嘅脈搏喎。
青年事務委員會主席蔡元雲認為係好事，蔡醫自從四年前接受特首嘅重任之後，成日都諗計，睇吓點樣可以令青年人嘅意見受到決策階層重視，頭三年，佢就年年舉辦「青年高峯會議」，今年亦定咗十一月中舉行，老董已答應出席。
不過，為咗令多啲青年人參與，蔡醫雄心勃勃想喺十八個區都搞「地區青年論壇」，由每區嘅學校，制服團體以及待業嘅社區青年組成，喺高峯會前於個別地區先開會，目前重籌組緊，估計有九個論壇可先成事，第十個會由八大院校加樹仁珠海組成。
今年高峯會嘅主題係「新一代的聲音與力量」，大會想探討喺教育、政制同傳媒範疇上，青年可以點樣參與，展現佢哋嘅力量，噚日蔡醫先搵嚟一眾傳媒代表，投石問路。



傳真︰2623-9278
電郵︰[email protected]