港府呢個月12號，即日本大地震發生翌日向日本發出紅色旅遊警告，韜哥13號如期帶團去大阪，佢話呢次係帶老友去食好嘢，由於機會難得，可一未必可再，所以無懼紅色旅警，拍拍心口就上機去也。呢個大阪團仲參觀咗附近名勝好似清水寺等，戲肉則係食盡大阪好嘢，「全程都係食米芝蓮餐廳、懷石料理」。
由於大阪距離災區較遠，韜哥話情況基本上冇乜異樣，不過佢覺得市面情況確係略為淡靜咗少少，始終災難當前，對遊客心情唔多唔少有啲影響，而酒店亦好爆棚，有人話係部份接近災區嘅人避災而至。
天災加上輻射威脅，日本食品出口大受影響，瑤柱、鮑魚等海味甚至有斷貨危機，韜哥話佢做圍村菜，材料平民化，呢啲貴價食材貨源短缺對佢影響微乎其微，短期而言對飲食業行家應該亦冇乜嚴重打擊，因為日本海味向來價錢高，一般食肆唔會用，真係用日本貨嘅食肆則唔憂無貨賣，「大部份都唔係家先入貨，有好多貨喺倉o架」。
今次大阪行盡興而回，韜哥話短期內無意再遊日本，唔係驚有地震海嘯，而係接手改革嘅灣仔榮華酒樓本月底登場，現時要趕工做足準備，「要日日落舖頭睇實，邊有時間帶團去旅行」。