賭王何鴻燊一向多情，聽聞最近又結新歡，唔單止派專機接佢返澳門，更大方到同香港首富李嘉誠分享。賭王品味多元化，今期得佢歡心嘅，係一款生果。配得上賭王身份嘅，當然要係果中之王。冇錯，新歡其實係有「貓山王」之稱嘅大馬頂級榴槤王。呢單嘢經新加坡《聯合晚報》曝光，消息認真驚人。
話說賭王6月23日獲邀出席新加坡濱海灣金沙賭場開幕禮，賭王五個手下先坐專機到達。呢五位仁兄原來有重要任務在身，就係要幫賭王贏得榴槤歸。

88個共花費12,000元

當地傳媒報道，賭王嘅手下一落機，即刻去到一家叫818榴槤攤嘅檔口，一口氣話要訂98個榴槤，要直接運返澳門咁話。榴槤舖老闆吳明倡話，都係第一次接到大豪客落單，不過因天氣關係同運送問題，最後只能提供88個榴槤，畀阿豪客裝成6箱拎走，仲由賭王嘅私人飛機直送返澳門。呢批「貓山王」榴槤大約要2,100蚊坡紙，即係約12,000蚊港元，對賭王嚟講真係濕濕碎。
當地傳媒消息靈通，話賭王私下醒咗十個畀首富李超人，唔通賭王怕獨食得太多，會肥到連隻襪都着唔落？
講返呢隻貓山王，真係大有來頭，來自大馬，每朝早新鮮送到新加坡。貓山即係果子狸，嗅覺靈敏，所以識搵最好食嘅榴槤，貓山王因此命名。據講貓山王喺當地都相當矜貴搶手。不過其實唔使搭飛機，八方上網睇過，香港新地旗下一田百貨都有得賣。

肝火盛血壓高不宜多吃

榴槤雖然好食，但要節制。中醫師關之義話，榴槤喺中醫角度係溫性食物，如身體燥火就要小心，食得太多容易燥熱。如果肝火盛、血壓高，都不宜多食，否則好易血壓上升。夜夢多嘅人係咁食會失眠。若然係年輕人，易動火，性慾興奮者亦要小心，否則食咗會出現慾念過強等現象。至於賭王買足88個榴槤，究竟適唔適合佢食呢？關醫師就話，佢唔係賭王主診醫生，唔方便評論喎。

mailto:[email protected]