華華喺堆填區晚晚食廿幾蚊兩餸飯，要幾頹有幾頹，正所謂「有咩頹飯未食過吖」，撞啱早排有位喺中環返工嘅朋友，投訴話喺中環食咗個50大元嘅兩餸頹飯，當然要去見識一下喇。

華華上星期六中午時間去到呢間位於太子大廈嘅快餐店，50蚊一個兩餸飯，唔包飲品，四個餸任君選擇，揀咗睇落正常、好難中伏嘅蕃茄炒蛋與椒鹽排骨。點知兩個餸都凍凍哋，只得白飯係熱；椒鹽骨味道偏咸，咬落乾過華華塊面，仲要硬到不得了；蕃茄炒蛋OK，只係冇乜味道啫。

坐隔籬枱有位哥哥仔見到華華食兩餸食，搭嘴話「畀50蚊食兩餸飯，得蕃茄蛋同翠肉瓜(似樣)，真係好唔抵食!」Bingo，完全講中重點。而佢就寧願畀多廿蚊左右，食碗雲吞麵。

雖然話人在中環，飲杯咖啡都要40蚊，食餐晏仔，預咗要一條紅衫魚先至落到樓，有快餐廳提供50蚊嘅兩餸飯，係比較實惠嘅選擇。但實惠還實惠，餐廳提供嘅餸菜應該畀番少少heart，調番轉咁講，如果一間快餐店連頹飯都做得好，其他菜色一定唔會差喇，都係另類宣傳啫。

查實華華平日去中環食晏，好少幫襯連鎖快餐店，事關行近中環中心，好似機利文新街一帶，有唔少食肆，一百幾十蚊都可以好好食一餐。

掌握財經生活資訊，即Like「蘋果ATM」fb專頁啦！
http://fb.com/appledailyatm