關心妍囡囡百日宴今日喺四季Ball Room舉行，早前講過個百日宴豪使百萬，認真夠誇，佢分兩場，朝早嗰場同親戚食自助餐，晏晝同朋友開cocktail酒會，場地設計有好多粉紅色、白色心心氣球，場邊擺咗兩個人咁高嘅吹氣bear bear公仔，現場有咁多心心，相信係襯番個女嘅名，囡囡叫楊榮心。

關心妍就話個百日宴籌備咗半年，自己都好緊張，因為結婚都冇喺香港搞婚禮：「BB暫時都好冷靜、又好乖!」今日個場地設計係古巨基幫佢構思、簡單而又難忘，囡囡見到公仔時，佢都擘大對眼，今次係老公負責搞，所以佢唔知用咗幾多錢，一直係想搞一個簡單party，因為係年尾，所以場地要搵朋友幫手。

朝早嗰場同親戚食自助餐筵開12圍，之後晏晝個party就有幾百人參與，BB就準備咗三套衫，不過因為B女個身比較長，所以囡囡見傳媒嗰套衫好似短裙咁，B女目前13磅重。