前日係鄭伊健39歲牛一，蒙嘉慧（YoYo）以正印女友身份出席生日會，但噚日馮仁昭聽一位圈中人講，原來早兩個禮拜前，佢喺九龍城街頭撞見YoYo同一個身形高大嘅男仔手拖手行街，呢個男仔之前同YoYo相約打保齡，仲俾周刊影咗相。呢位圈中人話YoYo一見到有熟人，即刻鬆手，同個男仔保持距離，咁啱早排有雜誌報道話YoYo一腳踏兩船，同伊健一齊之餘仲keep住同呢位碌齡男交往，佢仲話過唔理傳聞點講，最緊要張相影得靚就得，實情係點馮仁昭都好想知。

揚言戀情「穩定發展」

雖然係咁，伊健似乎對YoYo呢段情好投入，前晚仲話佢哋嘅戀情已經由「發展中」進升到「穩定地發展」，加上YoYo親手炮製生日蛋糕賀壽，仲唔甜到漏？早排YoYo喺《美女廚房》表演恐怖廚藝，但前晚嘅生日派對上，YoYo就猛叫該節目監製錢國偉試食，伊健食完就大讚話：「好食過美女廚房！」
散band嗰陣，馮仁昭見伊健春風滿面咁出嚟，佢話今年生日好開心，問佢會唔會同女友過二人世界？佢話：「唔會喇，都要開工，我有好多朋友。」再問佢有冇獲贈birthdaykiss，伊健就詐儍扮懵講咗去第二度，又話正印係林珊珊，記者即時講到明話「咁YoYo呢？」佢話：「你哋知少少就得啦。」伊健又話未咁快諗結婚，講到謝霆鋒閃電拉埋天窗，佢話：「佢快我慢，唔好講時間，順其自然啦。」