蔣怡同何基佑今日喺灣仔為ViuTV節目《超級奶爸》拍外景，節目以真人騷方式，記錄父母日常照顧仔女嘅行為，擔任今集嘉賓嘅蔣怡話自己雖然有個囡囡，算係識點樣同小朋友溝通，但拍攝時遇上小朋友突然心情唔好唔出聲，都會不知所措。

蔣怡話今次純粹係嘉賓身份，所以冇帶囡囡嚟，而何基佑就話之前有帶兩歲嘅囝囝一齊拍，過程尚算順利。講到近來唔少藝人帶仔女拍節目時都有遇到問題，好似陳小春同佢個仔就喺節目中好似嗌交（新聞連結： http://bit.ly/2xnC9Dm ），鄭希怡（Yumiko）就疑似當住囡囡梁浸浸面前爆粗，「（新聞連結： http://bit.ly/2k1Iui9 ），何基佑話：「其實我睇節目感覺小春同佢個仔感情好好，否則小春唔會有啲咩事就即刻同個仔道歉，囝囝又即刻同番Daddy講I Love You。」

至於Yumiko事件，何基佑就覺得對方唔係爆粗，但可以試吓拍嘢前先同仔女溝通好，例如拍攝完會獎賞佢嚟交換，咁樣子女會較容易接受。而問到蔣怡可介意同埋囡囡一齊拍節目？佢話：「我自己就冇乜所謂，但個女開始大，要等佢自己決定想唔想上鏡，想唔想俾同學朋友仔見到。」